Cemburu dan Bahasa Arab.. [Carito Bahaso Minang]

Sahdan, tasabuiklah kisah di suatu nagari, satu keluarga baru nan tingga di rumah sederhana. Di patang kamih malam jumaik, Labai Kari nan baru jadi marapulai, inyo sumbayang mugarik bajamaah jo bininyo, Halimah.

Sasudah salasai sumbayang, inyo ba dzikia jo bado'a panjang-panjang. Inyo kaluakan do'a nan lah nyo hapal salamo ko. Tiok salasai ciek do'a, bininyo langsuang ma-amin-kan.. tapi pas katiko salasai do'a sapu jagad, bininyo ko anok je.. nyo ulang dek labai ko do'a sapu jagad tu baliak, indak juo di-amin-kan dek bininyo doh.

Mako, nyo ulang sakali lai, agak kareh suaronyo dari sabalun e; "Robbana atina fid dunya hasanah, wa fil akhirati hasanah, wa qina 'adzaban naar".. ha, indak juo di-amin-kan dek bininyo ko doh..

Katiko lah salasai ba do'a, nyo tanyo dek labai ko ka bininyo; "Diak, ba'a kok indak ba-amin-kan do'a Ajo nan kudian tadi, diak? lah Ajo ulang pulo tigo kali mah, bato haniang-haniang je?"

"Ajo.. Katiko Ajo baco do'a nan panjang-panjang tadi tu ha, adiak amin-kan je sado e nyeh.. tapi ba'a kok indak ado namo adiak nan Ajo baco, namo si Hasanah taruih je nan Ajo baco nyeh..? sia bana Hasanah tu..?" jawek bininyo manggarutu.

"Wayyooik.. dek itu kiro e manggok we e..! mako e, diak, bagaja baso Arab.. buliah tau apo arati nan Ajo baco tu.. Hasanah tu bukan si Hasanah.. hasanah itu aratie kebaikan, sagalo nan elok-elok.. kito mamintak ka Allah, Tuhan kito,  supayo didatangkan sagalo kebaikan baiak di dunia, maupun di akhiraik" tarang labai ka bininyo..